Google кәсіби журналистерге, әуесқойларға және БАҚ жасағысы келетіндердің бәріне арналған News Lab арнайы ресурсын іске қосты. Корпорация жекелеген журналистерге де, тұтас редакцияларға да көмектесуі тиіс функционалы бар бірқатар құралдарды ұсынады.
Жаңа сервистің құралдары авторларға материал үшін тақырыпты жылдам іздеп, олар бойынша фактілерді жинап, тақырыптар бойынша іздеу сұранымдарын сараптап, пайдаланушылардың қызығушылық деңгейін қадағалап отыруға мүмкіндік береді. Жаңа материал жарық көргеннен кейін авторлар оған деген аудитория көзқарасын Google Analytics және YouTube көмегімен сараптай алады.
News Lab бір алаңда Google іздеу құралдарының және соңғы кезде азаматтық журналистика саласында пайда болған бастамалардың функционалын біріктіреді. Жобаның мақсаты — технологиялар мен медиа тоғысында журналистермен бірлесе отырып жаңа медиа индустриясын қалыптастыруға мүмкіндік беретін алаң құру.
Сервис алдыңғы қатарлы әлемдік басылымдардың үздік тәжірибесін көрсететін қысқа жазбаша және видеосабақтарға, сондай-ақ тақырыптық зерттеулерге қол жеткізуге мүмкіндік береді. Әзірге тек ағылшын тілінде, алайда жақын арада басқа тілдер де қосылады.
News Lab негізгі үш бөліктен тұрады: тақырып іздеуге және фактілі ақпарат жинауға арналған негізгі құралдарды қамтитын Tools, іздеу сұранымдарын және қандай да бір тақырыпқа қатысты қызығушылық деңгейін сараптайтын Google Trends және Programs — бүкіл дүние жүзі бойынша жаңалықтар ресурстары сілтемелерінің каталогы.
Google Trends сервисі жаңартылып, қазір іздеу сұранымдарындағы трендтер өзгерісін бұрынғыдай соңғы бір тәулік бойынша ғана емес, шынайы уақыт режимінде көрсетеді. Бүгінде сервис 28 елде жұмыс істейді, ал корпорация алдағы бірнеше айда оның географиясын кеңейтуге уәде беріп отыр.
Tools бөлігінде ақпаратты жинау және әзірлеу кезеңінде қажет болатын құралдар жинақталған. Сонымен қатар, мұнда жарияланған материалға аудиторияның көзқарасын Google Analytics көмегімен сараптауға мүмкіндік беретін Optimize бөлімі жәнеYouTube ұсынатын сараптау құралдары бар.
Сондай-ақ, жақында YouTube видеохостингінде әуесқой журналистер түсіретін видеоны жинақтайтын арна — Newswire жобасы іске қосылды. Ондағы контентті YouTube командасы тексеріп отырады, содан кейін барып кәсіби журналистер ол видеороликтерді өз мақсатына пайдалана алады.
