Ашық үкімет саласындағы жетекші бастамалардың бірі GDS (Government Digital Service) ұйымдар өз аудиториясымен байланыс орнату үшін қандай әлеуметтік медианы және қалай қолдануына болатыны туралы «Social Media Playbook» атты нұсқаулық жариялады.
Сол нұсқаулықтың негізгі ережелерінің аудармасын назарларыңызға ұсынамыз.
Әлеуметтік медианы қолдануды қалай бастау керек
Мақсаттарыңызды анықтап алыңыз
Ең алдымен, мақсаттарыңызды анықтап алу керек. Әлеуметтік медиа сізге не үшін керек? Ұйымыңыздың әлеуметтік стратегиясы соған байланысты болмақ.
Әлеуметтік медиа сіздің ұйым үшін қандай роль ойнайтынын анықтаудан бастаңыз.
Ақпарат тарату, жұртшылықты әлеуметтік кампанияларға тарту, зерттеу жүргізу немесе қауымдастық құру – осының бәрі және басқа да қызметтер әлеуметтік медианы қолданудың мақсаты бола алады.
Содан кейін осы мақсаттарға жету үшін қай әлеуметтік медианы қолданған дұрыс болатынын шешіп алу керек. Және, ол сіздің аудитория қолданатын әлеуметтік медиа болғаны абзал.
Әлеуметтік медиаға мониторинг жүргізіңіз
Әлеуметтік медиаға мониторинг жүргізу әлеуметтік стратегияны жоспарлаудағы маңызды қадам. Мониторинг жүргізуге көмектесетін көптеген құралдар бар.
Олардың арасынан өзіңізге ыңғайлысын таңдап алуыңызға болады, мысалы, GDS өз жұмысында Brandwatch құралын қолданады.
Осы құралдың көмегімен ай сайын түрлі әлеуметтік медиа, блогтар мен форумдарда GOV.UK және GDSС 15000 реттен астам аталуына мониторинг жүргізіледі. Бұл:
- Әлеуметтік медиада жұмыс істеу стратегиясына түзетулер енгізуге. «Бәрін дұрыс жасап жүрміз бе?» деген сұраққа жауап табуға
- Не болып жатқанын түсініп, шұғыл әрекет етуге
- Өткізіліп жатқан кампаниялардың тиімділігін бағалауға мүмкіндік береді.
Аудитория
Мониторинг құралдарының көмегімен сондай-ақ аудиторияңыз жөніндегі демографиялық ақпаратты да біле аласыз – осы арқылы сіздің контентті тұтынушылар кім екенін білесіз.
Мысалы, GDS аккаунттарының бірі @gdsteam жазылушыларының көбі 18-35 жасар ер адамдар, техникалық қауымдастық өкілдері екен. Оларды ашық үкімет тақырыбымен қызықтыру қиын болмады. GDS өздері әйелдерге де жиірек жүгінуі керек екенін түсініп, контент-стратегиясына «әйелдер және технология» деген тақырып енгізді.
Қандай әлеуметтік желілерді қолдану керек
GDS-дің бес түрлі Twitter-аккаунты, YouTube, Instagram, Flickr және LinkedIn аккаунттары бар. Оларға осынша көп әлеуметтік медиа керек пе? Керек.
Әр медиа арнасы өз бағдарламасын қолдайды, өз ролін атқарады және белгілі бір аудиторияға бағытталған. Сондай-ақ, қандай контент жасайтыныңызды да ойланыңыз, медиа түрін (мысалы, YouTube немесе Flickr) таңдау көп ретте соған байланысты.
Алайда, жаңа аккаунтты дұрыс жұмыс істетуге ресурсыңыз жетпейтін болса, тек аудиторияңыз сол жерде отыратындығы үшін ғана тағы бір әлеуметтік медиа түрінде аккаунт тіркеу дұрыс шешім бола қоймас.
Бес аккаунтты жүргізуге уақыт таппай, ақсатып алғаннан гөрі, бір аккаунтты тұрақты түрде, тиянақты жүргізген дұрыс.
Контент-стратегия
Аудиторияңыз кім екенін анықтап, қай әлеуметтік медианы қолданатыныңызды таңдағаннан кейін, контент-стратегия жасау керек. Ол кезде мына факторларды ескерген жөн:
- Аудиторияңыз сіз туралы не білгісі келеді? Оған қалай көмектесе аласыз?
- Ұйымыңыздың басымдықтары қандай? Не туралы айтып бергіңіз келеді?
- Алдыңғы жазбалар мен кампаниялар туралы мәліметтер (сондай жарияланымдарды тағы жасау керек пе?).
Бір мезгілде аудитория қалауын да, ұйым мүддесін де ескеру қиын болуы мүмкін, алайда контент-стратегияның маңызды бөлімі де осы.
Қауымдастықты меңгеру
Жауапкершілік
GDS жауапкершілікке сенеді. Өз аудиторияңызбан қарым-қатынас орнату және және ұйымыңыз үшін маңызды ақпаратты тарату үшін әлеуметтік медиа жүргізе бастасаңыз, өзара серіктестік үшін жауапкершілік жүктейсіз.
Бұл сіз талқылауларға араласып, әлдекім сізге сұрақ қойса, соған жауап беруіңіз керек дегенді білдіреді.
Егер жазылушыларыңыздың сауалдарына жауап беруге мүмкіндігіңіз болмаса, демек осы аккаунтты жүргізуге де мүмкіндігіңіз жоқ деген сөз.
Қастық ойлайтындар
Өкінішке орай, әлеуметтік медиада сіздің істеп жүрген жұмыстарыңызды жақтырмайтындар қай кезде де табылады.
Әлдекім Сіздің аккаунт туралы еш себепсіз жаман айтып, жазып, немесе қорлайтын, тіл тигізетін пікірлер жазған жағдайда не істеу керек?
Сіздің пайдаланушылар үшін не нәрсе дұрыс емес екенінің ережесін жазып қойыңыз (мысалы, қорлау, тіл тигізу, авторлық құқықтарды бұзу, жасырын жарнама, т.б.). Сондай-ақ, осы ережелерді бұзудың салдары қандай болатынын (мысалы, бірінші рет бұзғанда ескерту, келесі жолы бан) көрсетіңіз және осы шараларды ереже бұзушыларға қатысты қолданып отырыңыз.
Контент
Контент жасау
Әлеуметтік медиаға аудитория тарту үшін жақсы, сапалы контент өте маңызды. Қарапайым да әдемі суреттермен безендірілген өзекті тақырыптар бойынша жарияланымдар мыңдаған репост жинап, сіздің ресурсқа жақсы трафик әкелуі мүмкін.
Контент жасауға көмектесетін кеңестер:
- Егер дизайнермен бірлесіп жұмыс істесеңіз, оған тапсырманы егжей-тегжейлі түсіндіріп, оны контент әзірлеудің түрлі кезеңдеріне араластырыңыз – сонда ол не істеуі керек екенін жақсы түсінеді, ал сіз оның да пікірін біліп отырасыз.
- Контентіңіз түрлі платформаларда қалай көрінетіні туралы ойланыңыз. Мысалы, мақаладағы суретте ақпарат көбірек болуы мүмкін, өйткені пайдаланушылардың оны оқуға уақыты бар, ал Facebook немесе Twitter-дегі сурет бірден көзге түсіп, назар аудартуы тиіс, әйтпесе пайдаланушылар оны өткізіп жібереді.
- Қарапайымдылы жөнінде ұмытпаңыз – сурет өздігінен түсініксіз болса, ол жұмыс істемейді.
Жарияланымдар тізбесі
Жарияланымдарыңызды күнтізбе бойынша жоспарлап қойыңыз – соның көмегімен аңдатпа беру керек маңызды оқиғаларды ұмытып кетпейсіз.
Жалпы ережелер
Дұрыс безендірілмеген, сипаттамасы мен бірінші жарияланымы жоқ аккаунтты әлеуметтік медиаға жібермеңіз. Құр логотип суретімен ғана тұрған бос парақты ешкім көргісі келмейді.
Сондай-ақ, аккаунттарыңыз үнемі жаңарып тұруын және жаңа келушілер үшін «өлі» болып көрінбеуін қадағалап отырыңыз.
«Social Media Playbook» нұсқаулығын GOV.UK блогынан оқи аласыздар.
