Қазақ тілінде өтетін Öner Tili киносауат курсына тіркеу басталды. Медиа қызметкерлерін, студенттер мен кино саласына қызығатын барша жанды қатысуға шақырамыз.
Курсты белгілі кинотанушы, журналист, аудармашы, Лондондағы Мэри патшайым университетінің (Queen Mary University of London) докторанты, «Болашақ» стипендиясының түлегі Әсия Бағдәулетқызы жүргізеді.
Кино — демалыста уақыт өткізіп, көңіл көтеретін нәрсе ғана емес. Кино — медианың бір түрі, кино — өнер, кино — күнделікті өміріміздің айнасы. Әлемде видео контент тұтыну көлемі жылдан жылға артып, Қазақстан кино индустриясы да жыл өте ілгерілеп келеді. Бүгінде киносауаттың маңызы арта түсті. Қазір әрбір көрермен киносауат негізін білгені жөн.
Бұл курс фильмді қалай дұрыс қарап, оны қалай дұрыс талдап, қалай дұрыс тұтынуға болатынын үйретеді. Киноны ойын-сауық түрі емес, өнер саласы ретінде қарауға баулиды.
Курс барысында:
- Кино тарихы;
- Кино теориясы;
- Кино формасы: түрлері, жанрлары;
- Кино стилі: монтаж және дыбыс;
- Кино және қоғам
және басқа да маңызды тақырыптар талқыланады.
Курс жазда, 2022 жылғы маусым — тамыз айларында болады. 11 аптаға жалғасады. Кино саласы бойынша барлығы 11 дәріс жоспарланған. Екі мәрте кино талқылау ұйымдастырылады. Курс мазмұны мына жерде.
Дәрістер толықтай қазақ тілінде, аптасына бір рет, бейсенбі күндері кешкісін Zoom платформасында өтеді.
Курсқа қатысу үшін онлайн-өтінішті толтыру қажет. 2022 жылғы 5 маусымға дейін өтініш қабылданады.
***
Бұл курс Америка халқының көмегі арқасында Америка Құрама Штаттарының Халықаралық даму агенттігінің (USAID) қаржысымен Internews ұйымы іске асыратын «Орталық Азияның MediaCAMP бағдарламасы» аясында дайындалды. Öner Tili ақпараттың мазмұнына тікелей жауапты және ол ақпарат USAID, Америка Құрама Штаттары үкіметі немесе Internews пікіріне сай келмеуі мүмкін.
