Домой Блог Страница 77

Медиа мамандарына арналған стипендиялар мен гранттар

Назгүл Қожабекова
-
0
Медиа мамандарына арналған стипендиялар мен гранттар

Медиа мамандары үшін ең қызықты мүмкіндіктер топтамасын ұсынамыз.

  • АҚШ-тан тыс тұратын журналистер америкалық журналистика туралы түсінігін жақсартқысы келетін тәжірибелі журналистерге арналған үш айлық стипендияға (three-month fellowships) қатысуға шақырылады.

    • Бұл стипендияны Әлемдік баспасөз институты (World Press Institute (WPI) тыңдаушыларын АҚШ-тағы медиа жұмысының жағдайларымен таныстыру мақсатында ұсынып отыр. Бағдарлама 2015 жылғы тамыз айының ортасында басталып, қазан айының ортасында аяқталады. Қатысушылар Миннесотада тұрып оқиды, бірақ Нью-Йорк, Вашингтон және басқа да АҚШ қалаларына сапарға шығады. Өтінім қабылдау – 15.02.2015 дейін.

    • Пулитцер орталығы Интерньюспен бірігіп жетекшілік ететін Персефона Миль (Persephone Miel Fellowship) стипендиясы АҚШ-тан тыс жерлерде тұратын медиа саласының мамандарына көмек көрсетіп, өз жұмыстарын неғұрлым ауқымды халықаралық аудиторияға ұсынуға мүмкіндік беруге арналған. Қазір 2015 жылға тыңдаушылар іріктеліп жатыр, өтінім қабылдау 2015 жылғы 15 ақпанда аяқталады.

      • Стипендия АҚШ-тан тыс тұратын және өз елінен репортаждар әзірлеуге ниетті журналистерге, жазушыларға, фотографтарға, радиопродюсерлерге және фильм әзірлеушілерге арналған.

      • Торонтадағы Мунк Шолл әлемдік мәселелер университеті (University of Toronto’s Munk Scholl of Global Affairs) ғылыми немесе кәсіби дәрежесі бар мамандарды әлемдік журналистика бойынша 20 стипендияның (20 Fellowships in Global Journalism) біріне өтінім беруге шақырады.

        • Қатысушылар 2015 жылғы қыркүйек пен 2016 жылғы сәуір аралығында әлемдік медиа үшін өз саласында репортаждар әзірлейді, сонымен қатар әрқайсына танымал журналистер арасынан жетекші бекітіп беріледі. Өтінім қабылдау мерзімі – 20.02.2015 дейін. Стипендия жалпы сомасы 26 000 канада доллары болатын оқу құнының 10 000 долларын өтейді.

        • Бүкіл дүние жүзінің адамдары ақпаратқа қанығып, білім алып, көңілін көтеруі үшін жұмыс істейтін тілшілердің жаңа буынын дамыту мақсатында Google журналистика саласында стипендия (Google Journalism Fellowship) тағайындады. Бұл бағдарлама сюжеттерді жаңа, екпінді форматта жеткізу үшін жаңа технологияларды пайдалануға мүдделі барлық пән бойынша білім алып жатқан студенттер мен аспиранттарға арналған.

          • Он апталық стипендиялық бағдарлама Google-дің өзінде басталады, одан кейін қатысушы ұйымдарда тоғыз апталық жұмыс жүреді. Стипендиялар 2015 жылғы 8 маусымда басталады, қатысушылар неғұрлым ертерек өтінім бергені абзал.

          • Журналистер мен зерттеуші-редакторлар ұйымы (IRE) және Компьтютерлік технологиялар қолданылып жасалатын репортаждар ұлттық институты (NICAR) бірігіп, Атланта қаласында (Джорджия штаты) 2015 жылғы 5-8 наурызда деректер журналистикасына арналған жыл сайынғы конференциясын (annual conference devoted to data journalism) өткізеді.

            • Биыл конференция қатысушылардың барлығына сюжеттерді неғұрлым терең зерттеп, оқырман, көрермен және желілік аудиторияға сұранымға сай ақпарат жеткізу үшін қажетті құралдар туралы білуге мүмкіндік береді. Компьютерлендірілген репортаж жөніндегі конференция жас журналистерден бастап, цифрлік репортаждың шеберлеріне дейін пайдалы болмақ.

            Тұрақты өтінім қабылдау:

          • Пулитцер дағдарыс репортажы орталығы (Pulitzer Center on Crisis Reporting) кез келген елде тұратын журналистер, жазушылар, фотографтар, радиопродюсерлер, фильм түсірушілер мен фрилансерлерден саяхат жасауға грант алу үшін жоба жасауға ұсыныстар іздейді.

            • Ұсынылатын гранттарды саяхат жасап, америкалық медиа құралдарында толық ашылмаған тақырыптарды зерттеу үшін жұмсауға болады. Гранттардың көбі 2000-10000 доллар аралығында. Өтінім қабылдау ұдайы жүргізіледі (on a rolling basis).

            • Жазғы университеттің (SUN) 2015 жылғы бағдарламасы Орталық Еуропа университетінің (CEU Summer Program) Будапештте (Венгрия) өтетін жазғы бағдарламасына қатысуға өтінімдер қабылдайды. Бағдарлама 2015 жылғы 22 маусым мен 31 шілде аралығында болады. Қатысушылар жоғары деңгейлі, зерттеулерге бағытталған, пәнаралық академиялық курстар және кәсіби дамудағы ұстанымдар тақырыбында шеберлік сабақтарын өтеді. Жалпы өтінім қабылдау – 14.02.2015 дейін.

Вирустық видео жасау құпиялары

Назгүл Қожабекова
-
0

Вирустық видео – брендтерді, өнімдерді, қызметтерді және басқаларды ілгерілетудің ең тиімді тәсілдерінің бірі. Ел аузына ілігіп, жұрт сөз етіп, талқылап, тіпті пародия жасайтын роликтер.

Вирустық видео. Регина Юркинаның презентациясыz

Вирустық видео – брендтерді, өнімдерді, қызметтерді және басқаларды ілгерілетудің ең тиімді тәсілдерінің бірі. Ел аузына ілігіп, жұрт сөз етіп, талқылап, тіпті пародия жасайтын роликтер.

«МедиаБренд» конференциясы мен байқауының директоры, OneProudProduction бас продюсері Регина Юркинаның ойынша, мұндай видео табысқа жетуі үшін бірнеше фактор қажет — сәттілік, түйсік, Интернетке арнап видео жасау ережелерін түсіну. 28 қаңтарда Регина жаңа медиаға арналған вебинарлар циклінен кезекті сабақ өткізді.

Вирустық видео жасау үшін ең алдымен жақсы видео жасау керек. Ал ол вирустық видеоға айнала ма — кейін белгілі болады. Вирустық видео негізінен екі түрлі болады: кәсіби (жарнамалық немесе музыкалық) және қолданушылардың «кездейсоқ» видеосы: жарнамалық немесе шынымен қолданушылар кездейсоқ түсіріп, жариялай салған видео.

Жорта кездейсоқ видео да жақсы жұмыс істейді, мысалы, медиабағдарлама (не сайт, газет) қалай жұмыс істейтіні туралы роликтер жариялауына болады.

Музыкалық видео жұрт назарын ерекше аударады. Мына бір роликке қараңыздаршы. Ол жергілікті бір компания үшін жасалып, метрода жүру қауіпсіздігін насихаттауға арналған, ал нәтижесінде бүкіл дүние жүзіне танымал болып, оның желісімен бірнеше ойын да жасалып үлгеріпті.

Жорта кездейсоқ қолданушы видеосын жасау бәрінен қиын. Аудиторияңыз кімдер екенін есте ұстаңыз. Оған роликтің пайда болуы тарихы, сипаттамасы, оны тарату арналары байланысты болады.

Ілгерілету үшін пайдаланылған ресурстар мөлшері видеоның тиімділігіне әсер етеді деген пікір дұрыс емес. Мыңдаған қаралым ролик авторлары есеп жасағандай әсер туғызбауы мүмкін. Видеоға атау бергенде қарапайым адам беретін атауды таңдау керек. Жұртты мезі еткен «күлкілі», «соңына дейін көріңдер» деген сөздерден аулақ болыңыздар. Видео атауында да, сипаттамасында да адамды селт еткізер әлдене болуы керек.

Роликті әлеуметтік желілерде талқылауды өзіңіз бастаңыз: көбінесе қолданушылар бірінші болып пікір қалдыруға аса құлық таныта бермейді.

Әсіресе тосын әсері бар, тартымды, не болмаса, керісінше адамды шошытатын сәттер болғаны дұрыс.

Вирустық видео миллион рет қаралғаннан кейін осылай деп атала алады. Алайда, бәрі YouTube-тағы статистикаға қарап тұрған жоқ. Сондай-ақ, өзге көрсеткіштерді де, Фейсбук, Вконтакте, басқа желілерді де ескеру керек.

Негізгі трафик легі алғашқы екі аптада келеді. Содан кейін не видеоның сипаттамасын, не таралу ресурсын ауыстыру керек.

Вирустық видео көмегімен кез келген дүниені ілгерілетуге болады. Бірақ қашанда түпкі мақсатыңыз есте тұрсын. Ақша тапқыңыз келе ме? Ресурсқа пайдаланушылар тарту ма? Сату көрсеткіштерін арттыру ма?

Вирустық видеоның үздік үлгісі — Владивосток әуежайында дүкенде ет жеп тұрған мысық.

Ролик жаңалыққа айналып, Владивосток әуежайындағы балық дүкеніне үлкен пайда әкелді.

Немесе, тағы бір мысал: пайдаланушы видеосы делінгенмен, соңында компания ашық жарнама орналастырған. Бірақ, идея жүзеге асып, сату көлемі 8-9 ретке артқан.

Вирустық видео тек бір минут қана жүруі міндетті емес. Бастысы — іш пыстыратын болмауы.

Және, вирустық видео жасау құпиясы туралы дөп басып айтуға болатын жалғыз дерек осы шығар. Өйткені, теория әлі аздау, табысқа жету үшін практика керек.

Келесі вебинар екі аптадан кейін өтеді және онлайн арнайы жобаларға арналады. Толығырақ ақпарат кейінірек Новый репортерда шығады.

ВВС мультимедиа жобаларымен тәжірибе жасауға арналған Taster онлайн-платформасын іске қосты

Назгүл Қожабекова
-
0

BBC корпорациясы Taster онлайн-платформасын іске қосты, онда қолданушылар назарына медиакомпанияның жаңа жобалары ұсынылады.

Taster – идеялар, сервистер мен құралдарға арналған тәжірибелік алаң іспеттес.

«Жаңа жобамызды әлемге ұсынбас бұрын сіздерден оны байқап көруді сұраймыз», — дейді жоба авторлары.

Мұнда коллаждар, радио-шоу, интерактив видео және басқа да алуан түрлі форматтарды қолдану жоспарланып отыр. Taster ойындар жиынтығына ұқсайды — бәрі ерекше, интерактив және қызықты.

Бұл эксперимент тек оны жасаушылар үшін ғана болмайды, ВВС идеялары корпорацияның пайдаланушылармен өзара ынтымақтастықта жұмыс істеуге ұмтылысын, оқырман, тыңдарман, көрермендерді контент жасау ісіне араластырып отыру ниетін, жаңа аудитория іздеу талпынысын айқын көрсетеді.

Контент ұсынудың және пайдаланушылармен қарым-қатынас жасаудың жаңа тәсілдерін іздеп жүрсеңіз Taster-ді міндетті түрде зерттеп көріңіз. Мұнда қазірдің өзінде қызықты дүние көп, әлі де көбейе бермек.

Мысалы, «Your Story» бөлімінде сіздің өміріңіздегі (сіз оған фейсбуктағы аккаунтыңыз арқылы қосыласыз) ең маңызды деген оқиғалар мен күндер әлемдік маңызы бар ғаламдық оқиғалармен байланыстырылады.

Нәтижесінде интерактив тайм-линия шығады, онда сол кезде болған оқиға сипатталған ВВС материалдарына сілтеме беріледі.

Ал R1OT бөлімінде пайдаланушылар Radio1 бір бөлшегіне айналады: пайдаланушылар жіберген твиттер, фото және пікірлердің арасынан ең жақсылары эфирге шығады.

«Who’s in Today?» жобасы пайдаланушыларға редакцияға күнде қонаққа келетін тұлғалар туралы ақпарат береді: сипаттама, фотосурет, ВВС материалдарына сілтеме қоса беріледі.

Kneejerk — The Noise Next Door комик-тобы әлеуметтік желілердегі контенттен алып жасайтын қызықты қалжыңдар.

World Service Archive жобасы тарихты жақсы көретіндерге ұнап қалары сөзсіз — пайдаланушыларға ВВС архивіндегі соңғы 60 жылдағы 36 000 жазбаның арасынан бағдарламаларды тыңдап, тегтер мен кілт сөздерді бөліп отыру ұсынылады. Осылайша ол жинақты недәуір пайдалы ету жоспарланып отыр.

Бұл Taster ұсынатын идеялардың бір парасы ғана, сервис туралы толығырақ білу үшін және онымен жұмыс істеп көру үшін сілтемемен өту керек.

Регина Юркинаның «Вирустық видео» тақырыбындағы вебинары

Назгүл Қожабекова
-
0
Регина Юркинаның «Вирустық видео» тақырыбындағы вебинары

2015 жылғы 28 қаңтарда Регина Юркинаның «Вирустық видео» тақырыбында тегін вебинары өтеді. Вебинар медиа қызметкерлеріне, сонымен қатар блогерлерге, PR-мамандарына, жарнама агенттіктері мен үкіметтік емес ұйымдар қызметкерлеріне пайдалы болмақ.

Вирустық видео – аудитория назарын аударудың тиімді тәсілдерінің бірі. Вирустық әсері бар видеоны қалай жасауға болады? Қандай жағдайда медиа вирустық видеоны қолданса болады? Осы және өзге де сауалдардың жауабы — вебинар барысында беріледі.

Регина Юркина — «МедиаБренд» конференциясының және байқауының директоры, OneProudProduction бас продюсері. Әр кезеңдерде «Первый канал» (Мәскеу қ.) аңдатпа бөлімін басқарды, «Домашний» және Disney арналарының маркетинг жөніндегі директоры, «Интерньюс Қазақстан» маркетинг және жарнама жөніндегі кеңесшісі болды.

Вебинарға тіркелу үшін мына сілтеме бойынша өтіңіздер: http://u298188.seemedia.pro/event/virusnoevideo.

«Вирустық видео» тақырыбындағы вебинарды Internews Network өкілдігі ақпаратқа қол жеткізуді қолдау жобасы аясында, АҚШ халықаралық даму жөніндегі агенттігі (USAID) қолдауымен ұйымдастырып отыр.

Рейнольдстың журналистика институтының (RJI) стипендиялық бағдарламасы

Назгүл Қожабекова
-
0

Рейнольдстың журналистика институты (RJI) демеушілік ететін стипендиялық бағдарлама журналистика теориясы мен практикасы бойынша инновациялық идеялары бар тұлғалардан өтінімдер қабылдайды.

Биыл RJI мобильдік аудитория тарту мен монетизацияға бағытталған идеялар мен жобаларға әсіресе қызығушылық танытып отыр. Сондай-ақ бағдарлама журналистика көмегімен демократияны нығайтуға ықпал ететін жобаларға да мүдделі.

RJI журналистика индустриясында да, басқа салаларда да жұмыс істейтін жеке тұлғалардан өтінімдер қабылдайды. Институт резиденттік, резиденттік емес стипендиялар, сонымен қатар ұйымдарға арналған стипендиялар ұсынады.

Резиденттік стипендия қатысушылары сегіз ай бойы Миссуридегі журналистика мектебінің студенттер қалашығында тұрып, институттың оқу және техникалық ресурстарын пайдаланып, оқытушылармен және оқушылармен тығыз қатынаста болады. Стипендия иегерлері 10 000 АҚШ доллары көлемінде шәкіртақы және 10 000 АҚШ доллары көлемінде бейімделуге арналған бір реттік жәрдемақы алады.

Резиденттік емес стипендиялар жаңалықтар әзірлейтін, технологиялық және осы салаларға жақын компаниялардың өз жұмыс орнында отырып жүзеге асыра алатын идеясы бар қызметкерлеріне арналған. Ондай стипендия иегерлері бір жыл ішінде 20 000 АҚШ доллары көлемінде шәкіртақы алады, ол айына 2 500 АҚШ доллары сомасында төленіп отырады.

Ұйымдарға арналған 20 000 АҚШ доллары көлеміндегі стипендиялар компанияларға немесе ұйымдарға төленеді және жоба бойынша жұмыс істейтін уақытша қызметкерге немесе фрилансерге төленуі немесе жобаға байланысты өзге де қажеттіліктерге жұмсалуы мүмкін.

Өтінімдер 1 ақпанға дейін қабылданады. Толығырақ ақпарат алу үшін мында өтіңіздер.

Бизнес-журналистика саласында магистрлік бағдарлама бойынша білім алуға арналған стипендиялар

Назгүл Қожабекова
-
0
Бизнес-журналистика саласында магистрлік бағдарлама бойынша білім алуға арналған стипендиялар

Бүкіл дүние жүзінің ағылшын тілін жетік білетін журналистері осы бағдарлама бойынша білім алуға өтінім беруіне болады.

Қытайдың үздік оқу орындарының бірі Цинхуа университетінің журналистика және коммуникациялар мектебі ғаламдық іскерлік журналистика саласында магистрлік бағдарлама бойынша оқуды ұсынады. Екі жылға есептелген бұл бағдарлама — Қытайдағы іскерлік журналистика саласында толығымен ағылшын тілінде оқытылатын жалғыз магистрлік бағдарлама.

Бағдарлама бойынша оқитын студенттердің жартысы — Қытай тұрғындары, қалған жартысы — өзге елдерден келгендер. Оқуға берілетін стипендиялар саны шектеулі.

Халықаралық оқытушылар тобы жүргізетін бағдарлама бизнес-журналистерге қажетті мәліметтерді іздеу және экономикаға байланысты тақырыптар бойынша материалдар әзірлеуде мультимедианы қолдану сияқты дағдылар мен машықтарды меңгертеді. Бағдарламаға қатысатын студенттер он Bloomberg терминалымен жабдықталған медиалабораторияның мүмкіндіктерін де пайдалана алады.

Өтінімдер 28 ақпанға дейін қабылданады. Толығырақ мында.

Internews Network «Newsroom 2.0» жобасына қатысу жөніндегі байқауды қорытындылады

Назгүл Қожабекова
-
0
Internews Network «Newsroom 2.0» жобасына қатысу жөніндегі байқауды қорытындылады

Internews Network «Newsroom 2.0» жобасына қатысу жөніндегі байқауды қорытындылады. Байқауға барлығы 29 өтінім келіп түскен, оның он жетісі – Қазақстаннан, алтауы – Қырғызстаннан және тағы алтауы Тәжікстаннан.

 

Байқау іріктеуінен мына медиа жобалар өтті:

Тәжікстан:

  1. «Азия Плюс» ақпарат агенттігі
  2. «Тироз» ТРК

Қазылар алқасы:

Асомиддин Атоев, Интернет провайдерлер ассоциациясының төрағасы

Вадим Саданшоев, USAID өкілі

Шахло Акобирова,  «ХОМА» ҮЕҰ директоры.

Қырғызстан:

  1. «Ынтымак» Аймақтық қоғамдық телерадиокомпаниясы, Ош
  2. «Вечерний Бишкек» баспа үйі» ЖАҚ, Бішкек

Қазылар алқасы:

Агуль Догдурова, USAID жобаларды басқару жөніндегі маманы

Бегаим Усенова, «Институт Медиа Полиси» КЕҰ директоры

Гапаров Батырбек, «Интерньюс Бишкек» өкілдігінің техникалық директоры

Тимур Оганов, «Интерньюс Бишкек» өкілдігінің аймақтық бағдарламалар маманы (алқа хатшысы)

Қазақстан:

  1. «Алау» телерадиокомпаниясы ( «Алау-ТВ» ЖШС), Қостанай
  2. «Қызылорда қоғамдық телекомпаниясы» ЖШС («Қоғам ТВ» телекомпаниясы,  «Қоғам» газеті), Қызылорда

Қазылар алқасы:

Мадина Кұсмолданова, USAID өкілі

Шавкат Сабиров, «Қазақстанның интернет ассоциациясы» ЗТБ директоры

Жәмила Асанова, «Азаматтық қоғамды дамыту ассоциациясы» ЗТБ директоры

Қатысушыларға техникалық және кеңес беру жөніндегі көмек Қазақстан, Қырғызстан және Тәжікстандағы ақпаратқа қол жеткізу жобасы аясында көрсетіледі.  Ол АҚШ Халықаралық даму жөніндегі агенттігі (USAID) қолдауымен жүзеге асырылады.

Негізгі бағыттар – БАҚ тұрақтылығын дамыту, ресурстардың бизнес-әлеуетін арттыру және аудиториясын көбейту, аудиторияны ақпарат әзірлеу және оны талқылауға белсенді араластыру.

Өңірлік БАҚ үшін мобильдік қосымша жасау

Назгүл Қожабекова
-
0
Өңірлік БАҚ үшін мобильдік қосымша жасау

Бір жыл бұрын Орал қаласындағы «Мой город» газеті iOS және Android платформаларына арналған мобильдік қосымшасын іске қосқан. Басылымның бас редакторы Жаннат Нұғманова Новый репортер порталына газет оқырмандары жаңа сервисті қалай қабылдағаны жөнінде айтып беріп, өз мобильдік қосымшасын іске қосқалы жүрген медиаменеджерлерге арналған кеңестерімен бөлісті.

— Жаннат, мобильдік қосымша жасау қаншалықты қымбат?
— Біз «Сорос Қазақстан» қоры ұйымдастырған грант байқауын жеңіп алдық. Қосымша жасауға 1 млн теңгедей қаржы жұмсалды.

Қосымшалардың техникалық жасақталуын украиналық әзірлеушір жасады. Олар ұсынған қызмет бағасы Қазақстан, Ресей және Белоруссиядан түскен ұсыныстарға қарағанда арзанырақ болды. Біз әзірлеушілерді бірнеше апта іздедік. Интернет іздеп, оларға хат жазып, техникалық тапсырма беріп, баға ұсыныстарын күттік. Шын мәнінде, жақсы әзірлеуші табу қиын емес.
Бүгінге дейін қосымша 5 200 рет көшіріліпті (айфондарға 490 рет қана, бұл iOS платформалы смартфондарға қарағанда, Android смартфондары бізде кеңірек тарағанымен байланысты).

— Жеке қосымшасы пайда болғаны «Мой город» газетіне қалай әсер етті?
— Сайтта смартфон қолданатын оқырмандардың пікірлері көбейді (жалпы пікір санының 25%).
«Халық» жаңалықтары келіп түсе бастады. «Мой ГОРОД» қосымшасындағы арнайы батырма қолданушыларымызға фото немесе қысқа видео түсіріп, оны сол сәтте редакцияға жолдауға мүмкіндік береді. Жұрт жаңалықтар жолдап жатады, әдетте адам бір рет байқап көріп, қалай жұмыс істейтін көріп алса болды, жаңалықтар жолдай береді.

Березовкада балалар уланғаны туралы ақпаратты бірінші болып осы қосымшаның арқасында жарияладық. Ол жаңалықты жолдаған адам аты-жөнін жазбапты, алайда балалар Ақсайдағы аудандық ауруханаға жеткізіліп жатқаны жөнінде алғашқы ақпаратты «Жаңалықты жеткіз» сервисі арқылы алдық. Содан кейін барып шу шығып, ол әлі де толастамай келеді.

Көбінесе жол-көлік апаттары туралы хабарламалар жиі келеді. Ондай кезде біздің тілшілер оқиға орнына ресми қызметтер өкілдерінен бұрын жетеді.
Бір рет, апат орнына келсек, бір бала бізден «Қайдан келдіңіздер?» деп сұрады. «Мой ГОРОД» десек, «О, сіздерге сурет жіберген мен ғой!» деді.

Адамға қандай да бір оқиғаға қатысты екенін, өзі ерінбей ақпарат жібергені арқасында осы оқиға қоғамдық резонанс тудырғанын білу ұнайды.

Оған қоса біз оқырмандарымызға ұялы телефоны шотына ақша жібереміз – бұл да ұнайды.
Алайда, жұрт жапа-тармағай біздің қосымшаны пайдаланып отыр деп айта алмаймыз. Оған уақыт керек, біз де дамып келеміз.

Өз мобильдік қосымшасын әзірлеуді ойластырып жүрген медиаменджерлерге кеңестер:
• Техникалық тапсырманы мұқият құрыңыз, сізге не керек екенін, сіздің қосымшаны орнатқан адам не ұтатынын ойластырыңыз.
• Жүктелімдер статистикасын жүргізіңіз – бұл сіздің аудиторияның өзгеру барысын сараптауға мүмкіндік береді.
• Өз қосымшаңызды AppStore мен PlayMarket-ке орналастырсаңыз болды, оны бәрі көреді деген сөз емес. Онда миллиондаған қосымша бар, сондықтан болашақ қолданушыларыңыз оларды қалай, қандай тегтер бойынша табатынын ойластырыңыз.
• Кез келген өнім сияқты, қосымшаны да «айналдыру» керек – жарнамалық кампанияны да қамдап қойыңыз.

Әлеуметтік желідегі медиа: #СелфиДляЛады. Сәтті байқау ұйымдастыру үлгісі

Назгүл Қожабекова
-
0
Әлеуметтік желідегі медиа: #СелфиДляЛады. Сәтті байқау ұйымдастыру үлгісі

Әлеуметтік желілер — медиа жұмысындағы аса маңызды құралдардың бірі. Бұл — ақпарат көзі, аудитория тарту арнасы, қолданушылармен қарым-қатынас жасау алаңы.

Ақтау қаласындағы «Лада» газеті жаңа жыл алдында әлеуметтік желілерде ерекше байқау өткізді, оған тек медиа оқырмандары ғана емес, қалалық компаниялар да қатысты, ал кейбір республикалық бұқаралық ақпарат құралдары байқауды жаңалыққа да айналдырды.

Олжас Мырзағалиев, журналист, «Ладаның» веб-редакторы:

Жаңа жыл алдында фотобайқау ұйымдастыруды ұйғардық. Бір кездері біз байқаларды жиі өткізетін едік — газет бетінде де, сайтта да. Бірақ осы жолы біраз эксперимент жасап көрмек болдық — бұрын қолданушылар фотоларын біздің сайтқа салатын, енді біз олардан суреттерді өздерінің әлеуметтік желілердегі парақшаларына орналастыруды сұрадық.

Үш желі таңдап алынды – VK, FB және Instagram. Басты мақсат — біздің аккаунттарға жұрт назарын аудару болды. Айта кетейін, жазылушылар саны артқаны байқала қоймады, оған себеп — бұл байқау өткізілген әлеуметтік желілерде біздің жағдайымыз онсыз да жақсы болғаны шығар (VK – 67 мыңнан астам, Instagram – 8 мыңнан астам жазылушы). FB желісінде үш-ақ қатысушы болды. Бар-жоғы байқауға жүзге тарта сурет келіп түсті.

Есесіне, біз жақсы тәжірибе жинақтап, әр тараптан түрлі әсер алдық.

Сонымен, қатысушыларға берілген тапсырма — келе жатқан жыл иесімен — қой, ешкі, қошақанмен — селфи жасау болатын.

Әрине, ол тірі жануар болуы шарт емес еді. Алайда, бірнеше мысал келтіре кету үшін біз бір тілші мен фотографты мал базарына жібердік. Нәтижесінде қызықты фотолар пайда болды, оларға қолданушыларымыз да еліктеп, шын мәнінде ерінбей, тірі жануарлармен суретке түсу мүмкіндігін іздей бастады 😉

Фотосуреттер лайктар саны бойынша бағаланды, байқау шарттарын түгел жазып отырмас үшін, сілтеме ұсынамыз.

Сонымен қатар, біз жақсы сыйлықтар да әзірлеп қойдық — арнайы тапсырыспен жаңа IPad mini және екі IPod алдырдық.

Аудиторияның қызығушылығы

Аудиторияға байқау қалай әсер еткенін дөп басып айту қиын — біреулер бұл идеяны мазақ деп қабылдады, енді біреулер оң қабақ танытты.

Сайттағы қолданушылар арасында ең танымал болған қалжың — «Бастығыммен түскен суретімді жіберсем бола ма?».

Қиындықтар

Өтірік лайктар жинау — әлеуметтік желілердегі басты мәселелердің бірі. Жұрт бізді алдағысы келген жағдайлар да болды. Мысалы, елу ғана жазылушысы бар аккаунт мың лайк жинаған. Лайк басқандар арасында неге екенін, Мексика, Бразилия, басқа елдердің де тұрғынадары болды, олар үшін ақтаулық селфи байқауы қызықты болуы екіталай.

Біз мұндай жағдай боларын алдын ала болжап, байқауды екі кезеңге бөліп өткіздік — финалдық кезең біздің сайтта өтуі тиіс болатын, онда жағдайды бақылауда ұстап отырдық.

Нәтижесінде үш жеңімпазды таңдап алдық. Бесінші қаңтар күні редакцияға шақырып, сыйлықтарын тапсырдық.

Байқауды бірнеше компания өз қызметтерін ілгерілету үшін пайдаланғаны да қызықты. Мысалы, супермаркеттер желісі жаңа жыл алында бір дүкеннің алдында екі қошқар орналасқан фотоға түсу аймағын жасап қойды. Әлеуметтік желілерде олар «Лада үшін селфиге» түсуге осында келіңдер деп үндеу тастады.

Ойыншықтар жасаумен айналысатын бір әйел өзі жасаған handmade-қошақандармен селфи жасауды ұсынған.

Ағылшын тілін үйрететін орталық біздің байқауға қатысу үшін ермексаздан селфи жасаған.

  • Әлеуметтік желілерде байқауды қалай сәтті өткізуге болады? Медиа үшін кеңестер
  • Хештег туралы ұмытпаңыздар — біздің хештег #СелфиДляЛады болды.
  • Кері байланысқа мұқият болыңыздар — біз пікірлердің бәрін оқып шықтық, енді көктемгі байқауды ойластырып жатырмыз.
  • Байқауларыңызға көңіл-күй қосып, жұртты күлдіріп отырыңыздар — жарыстардың бәрі солай көңілді өтуі керек.
  • Сыйлықтарға сараң болмаңыздар! Жеңімпаздар риза болды, біз де оларға жақсы сый жасағанымызға қуандық.

Айдана Нұрмұхан
-
0

«Жеті күн», Хабар

«Жеті күннің» басты тақырыбы Тоқаевтың Мәскеуде өткен Еуразиялық экономикалық форумға қатысуы, сонда жасаған мәлімдемелері болды. Сюжетте ұйым аясында шешілмеген мәселелер бар екені айтылды, Қазақстанның өкілі Бақытжан Сағынтаев пікір білдірді. Автор бұл ұйымға мүше кей мемлекеттердің айта алмағанын Тоқаев жария еткеніне тоқталды. Сонымен қатар, санкциялар құрсауында отырған Мәскеуден ұйымның штаб-пәтерін көшіру мәселесінің өзекті екеніне тоқталып, оған қатысты сарапшы пікірі берілді. Жалпы қоғамда ұйымнан шығу туралы да ұсыныс тасталып, талқыланатыны айтылды. Негізінен президенттің мәлімдемелеріне басымдық беріп, сюжет әзірлейтін бағдарлама үшін мұның жаңашыл қадам екенін атап өткен жөн. Сюжет әдеттегідей ұзақ болды.

Келесі тақырып – Түркиядағы Президент сайлауы. Өткен жексенбіде сайлаудың екінші туры өтті. Сюжетте саяси доданың барысы, Түркияның экономикалық жағдайы, кандидаттар жайлы көп ақпарат бар. Сарапшылар Ердоғанның саяси салмағы туралы пікір білдірді. «Жеті күннің» шет елде болып жатқан оқиғаларға бұлайшы кең тоқталуы сирек еді.

Осы сюжеттен кейін бағдарлама жүргізушісі қоғамдағы әйелдердің дәстүрге сай емес «жабық» киіне бастағанына қатысты ұзақ толғанды. Айта кету керек, соңғы аптада бұл тақырып әлеуметтік желілерде қызу талқыланды. Ислам мемлекеттеріндегі киіну үлгісінің қазақ қоғамына жат екенін айта келе, әңгіменің соңы әйелдердің отбасындағы рөлі, тіпті отбасының қаржылық жағдайына тірелді. Осылайша, жүргізуші жеке тұлғаның банкроттықты рәсімдеуі туралы шаралардың қалай жүзеге асып жатқаны туралы сюжетке кезек берді. Тәжірибелі журналистті сөгу ойымызда жоқ. Дегенмен тақырыптарды ауыстырғанда «хабарымызды жалғастырамыз» немесе «өзге тақырыптарға ойыссақ» секілді көрермен назарын бұра алатын тіркестерді пайдалануға болады емес пе? Қазақ әйелінің киінуі мен отбасының борыш жүктемесін байланыстыру қисынсыз.

Ал Индира Жылқайдарова әзірлеген сюжетте «Банкроттық туралы» қабылданған заңның шикі тұстары бар екені, банкроттыққа берілген өтініштің басым көпшілігі мақұлданбағаны және заң қолданысқа енген бірнеше айдан бері банкрот деп танылғандар жоқтың қасы екені айтылды. Заңгерлер, құзырлы орган өкілдері және қарапайым азаматтар сөйлеген толымды сюжет.

Ауылшаруашылығы саласын субсидиялау туралы сюжетте қаражат ала алмай жүрген шаруалардың мұңы айтылды. Субсидия беру тәртібіне көңілі толмайтын тараптың уәжі мен Ауылшаруашылығы министрлігінің түсініктемесі бар.

Соңғы сюжетті Қостанайдағы Kazlit.kz зауытының жұмысы туралы PR материал деп ұқтық.

Бағдарлама соңында жүргізушісі Махат Садық тағы да қазақ қыздары туралы бір-екі ауыз айтып, Астанадағы музыкалық жас көрермендер театры қойған «Гауһартас» қойылымына барғанын айтты. Осылайша, ақпараттық-сараптамалық бағдарламаның бұл саны аталған мюзиклде шырқалған әндердің бірінен үзінді берумен аяқталды.

Sarap Тimes, Astana TV

«Қазақстан ешбір одаққа қосылмайды». Тоқаевтың осы мәлімдемесі «Хабар» және AstanaTV—дағы сараптамалық бағдарлама жүргізушілері сүйіншілей айтқан алғысөзі болды. Дастан Сейілханұлы хабарды Тоқаевтың Еуразиялық экономикалық форум жұмысына қатысқаны, онда Қазақстан тек экономикалық интеграцияға ұмтылатыны туралы мәлімдемесін айтудан бастады. Алайда жиыннан сюжет әзірленбеді. Кадрдан тыс мәтін және синхрон арқылы қысқа қайырды.

Қазақстанда заңдар қазақ тілінде әзірленетін болады. Бұл мәселені Мәжілістен депутат Үнзила Шапақ көтеріп, депутаттық сауал тастаған. Сюжетте заңдардың қазақша нұсқасы түсініксіз болатыны айтылып, терминдердің қазақша баламасында бірізділік жоқтығы туралы мәселе көтерілді. Вице-премьер Алтай Көлгіновтің жауабы бар.

Студиядағы сұхбатта Мәжіліс депутаты Берік Бейсенғалиевпен «Ұлттық қор – балаларға» жобасының заңнамалық негізі талқыланды.

Мәжіліс депутаттары ақылы автотұрақтар проблемасын да көтерген болатын. Sarap Тimes осы жайында да сюжет әзірледі. Мәжілісте бұл мәселені Amanat партиясының мүшесі Самат Нұртаза көтерген. Материалда автотұрақтан түсетін қаражаттың тек 5%  мемлекет қазынасына түсетініне мән берілді.

Павлодар облысындағы Үштерек ауылында қойға қасқыр тектес жабайы иттер шабуыл жасапты. Тұрғындар мұндай жыртқыштар енді адамға шабуы мүмкін деп қауіптенеді. Үкіметтен өтемақы да сұрап отыр. Сюжет проблеманы көтерген, рас. Дегенмен, сараптама жоқ. Күнделікті жаңалықтар форматындағы материал.

Ал Түркістан облысындағы жылыжайлардың проблемасы туралы сюжетті ерекше атап өту керек. Сырттан тасымалданған арзан өнімдердің салдарынан отандық өндірушілер өз өнімдерін лайықты бағаға сата алмай отыр. Оған қатысты шаруалардың да, құзырлы мекеме өкілдерінің де пікірі бар. Мәселеге жан-жақты талдау жасалған сюжет.

Елімізде сарапшылар лудомандарды – құмар ойыншыларды тіркеуге алуды, олардың әлеуметтік портретін жасау үшін зерттеу жүргізуді ұсынып отыр. Бағдарлама осы жайында да сюжет әзірленіпті. Парламентте ойын бизнесі туралы да заң қаралып жатқаны айтылған. Сарашылар, зерттеу жүргізуге ниеттенген бастамашыл топ өкілдері, психологтар, ҚМА өкілі пікір білдірген. Алайда, тілші тағы бір тарап осы қызметті ұсынатын кәсіпкерлердің пікірін білуге талпынбаған екен. Өйткені, лудомандарды тіркеуге алу олардың қызметтеріне де белгілі бір жауапкершілік артуы мүмкін ғой?

Денсаулық министрлігі жас отбасыларға Денсаулық картасын енгізуді ұсынып отыр. Ондағы мақсат жастардың ең алдымен денсаулығына мән беруі, дүниеге дені сау сәбидің келуіне жауапкершілік алуға ықпал ету болса керек. Бағдарлама әзірлеген сюжет осы турасында. Әзірге бұл жоба, ол әлі қабылданбаған. Оған қатысты депуттардың пікірі бар, қарапайым адамдар да пікір білдіріпті. Дәрігерлер де өз уәждерін айтыпты.

«Айна», Еуразия бірінші арнасы

1-шілдеден бастап платформалық жүйелерде жұмыс істейтін қызметкерлер салық төлейтін болады. Тілші Ақбота Тәңірбергекн осы мәселеге қатысты тараптардың пікірін тыңдап қайтыпты. Жоба қанат қақты болғандықтан, әзірге ешкімді ешкім салық төле деп мәндеттемейтіні айтылған. Дауысына сарказм қосқан тілші бұл жобаға деген қоғамдағы қарсылықты білдіргісі келгендей.

Мейрамханаларда қызмет көрсету ақысы немесе алдын-ала депозит алу – заңға қайшы екен. Әсем Изатқызы тұқтынушылар құқын қорғау саласындағы сарапшымен бірге Астанадағы бірнеше мейрамханаға кіріп, қызметкерлерімен, келушілерімен сөйлесіп, заң талаптарын түсіндіруге талпынып көріпті. Заңгердің, құзырлы орган өкілінің пікірі бар. Журналистік зерттеу бағытында әзірленген материал.

«Айна» бағдарламасы көтерген тағы бір тың тақырып – Алматыда орналасқан бірнеше ғылыми-зерттеу институтттарының материалды-техникалық жағдайы. Қабырғалары қақырап, керегелері сөгіліп тұрған зоология институтының жағдайы тіпті мүшкіл. Онда зерттеу жүргізуге арналған заманауи құралдар да жоқ. Ал, сюжетте баяндалған тағы екі институттың да жағдайы мәз емес. Ол мәселеге қатысты Жоғары білім министрлігінің маманы пікір білдіріп, ақша бөлінгенін жазыпты.

«Ұлттық қор – балаларға» жобасын жүзеге асыру тітіктерін анықтау бойынша заң жобасы Парламентте қаралып жатыр. «eGov куәгері» айдарында БЖЗҚ өкілі, Қаржы министрлігі өкілі заңның жүзеге асырылу тетіктерін түсіндіріп беріпті.

Бағдарламаны әдеттегідей «Хайпқа бұйырмаңыз» айдары аяқтады.

 

1...757677Страница 77 из 77

Бұл уеб-сайт америкалықтардың АҚШ халықаралық даму агенттігі (USAID) арқылы көрсеткен көмегімен мүмкін болды. Internews Қазақстан жарияланымдардың мазмұнына жауап береді, бұл АҚШ Үкіметі немесе USAID позициясын міндетті түрде білдірмейді. «Медиасын» бөліміндегі жарияланымдар автордың көзқарасын көрсетеді, бірақ Internews-тің, USAID-тің немесе АҚШ Үкіметінің позициясын міндетті түрде білдірмейді.

Хабарласыңыз: info@newreporter.org

СІЛТЕМЕЛЕР