2021 йил 21-26 сентябрь кунлари Internews халқаро нодавлат ташкилоти Ўзбекистон онлайн ОАВ журналистлари ва блогерлар учун «Фактчекинг асослари» мавзуида онлайн тренинг ташкил қилади.
Фактчекинг ёки фактларни текшириш – маълумотнинг ишончлилик даражасини текшириш. Фактчекинг анчадан бери матбуот соҳаси мутахассислари учун энг талаб юқори кўникмалардан бирига айланган. Фактларни текшириб, сиз вазиятга холис назар ташлай оласиз, турли чалғитишларга чув тушмайсиз ва аудиториянгизга фақат тўғри ахборот етказасиз. Бу раддия чоп этиш, суд даъволари ва туҳмат каби жиддий муаммоларнинг олдини олишга ёрдам беради. Фактчекингнинг замонавий тамойиллари журналистиканинг ишончлилик, холислик, ҳаққонийлик ва аниқлик каби профессионал ҳамда ахлоқий тамойилларига асосланган.
Онлайн тренинг давомида кўриб чиқиладиган ва иш олиб бориладиган мавзулар:
— фактчекинг назарияси ва асосий тушунчалари
— фактчекинг объектини танлаш мезонлари
— фактларнинг ҳаққонийлигини текшириш усуллари
— маълумотларни қиёсий текшириш ва фактларни текшириш воситалари
Тренинг нафақат назарий материаллар билан ишлаш, балки иштирокчилар томонидан амалий топшириқларни бажаришни, шунингдек, вебинарлар ўртасида мураббийлар билан фикр-мулоҳазалар алмашишни ўз ичига олади.
Вебинарлар жадвали: 2021 йилнинг 21, 23, 25, 26 сентябрь кунлари. Эътибор беринг, вебинарлар дам олиш кунлари ҳам бўлиб ўтади. Машғулотларнинг вақти ҳақида кейинроқ хабар берамиз.
Ўқитиш тили: рус/ўзбек (синхрон таржима билан)
Мураббийлар:
— Рустам Гулов – медиасаводхонлик ва янги медиа бўйича мутахассис, блогер, медиа-мураббий ва Тожикистонда биринчи фактчекинг платформаси Factcheck.tj асосчиларидан бири
— Жамшед Марупов – журналист, медиа-эксперт, Factcheck.tj сайтининг асосчиларидан бири ва бош муҳаррири
Ҳужжатлар 16 сентябрь соат 23:00 гача (Тошкент вақти билан) қабул қилинади.
Рўйхатдан ўтиш учун онлайн шаклни тўлдиринг.
Барча саволлар билан ekhmelevskaya@internews.org электрон манзилига мурожаат қилишингиз мумкин.
